Rreth 3000 banorë të fshatrave Çërravë dhe Qershizë në Pogradec prej vitesh ankohen për amortizimin e rrugës kryesore.
Kjo vjen për shkak të qarkullimit të kamionave të tonazhit të rëndë, të cilët marrin inerte në kodrat përreth.
“Unë po bëj 52 vjeç që kam ardhur këtu, këtë rrugë siç e kam gjetur ashtu do e lë se do vdes. Hyn kush hyn, del kush del, këtu nuk ka rregull…”, tha një grua.
“Kamionat e kanë prishur rrugën, ne duam zgjidhje që asnjë kamion të mos lëvizë”.
“Këtu kalojnë kamiona të rëndë. Pasuria e malit për Çerravë do ishte lule. Këta i marrin këtu e bëjnë autostrada gjëra e ne rrugën na i prishin”, tha një zotëri.
Kryeplaku i fshatit Çërravë tregon se ka komunikuar me administratorin e kompanisë që përdor pasuritë minerare dhe kryetarin e bashkisë Pogradec, të cilët kanë premtuar zgjidhje, por ende asgjë nuk është bërë“Kam kontaktuar me kryetarin e bashkisë në prezencën e administratorit dhe na është premtuar se duke qenë se rruga ka vite e amortizuar do shtrohet. Puna e kamionave pretendohet që do të gjendet një zgjidhje. Kështu na është premtuar”,- tha Dritan Beqirllari, kryeplaku i fshatit ÇerravëNga komunikimi që Kolibri.al pati me zyrtarë të bashkisë Pogradec ata treguan se rehabilitimi i rrugës kryesore është parashikuar në buxhetin e këtij viti, madje brenda një kohe shumë të shkurtër rruga do të jetë e përfunduar, rreth 2-3 javë. Ndërkohë që problemi i kamionave të tonazhit të rëndë është i zgjidhur, pasi është vendosur orar për këto mjete, dhe do të kalojnë mbasdite dhe në orët e vona të natës, si dhe po krijohet mundësia për të bërë një rrugë alternative, që mjetet e tonazhit të rëndë të kalojnë në rrugë të veçantë.
