Përpjekja shumëmilionëshe për të zhbërë shpalljen “non grata” të Sali Berishës duket se ka prodhuar vetëm… një postim në Twitter.
Një gazetar i përfshirë në përpjekjet lobuese të LaCivita-s i është drejtuar një zyrtari të Departamentit Amerikan të Shtetit (pa specifikuar kush), për të pyetur nëse Berisha mund të lejohej të udhëtonte drejt SHBA-së. Përgjigja që mori ishte në të njëjtin nivel si ajo që do të merrte nga ChatGPT – që përjashtimet mund të bëhen për arsye të sigurisë kombëtare apo interesave madhore të SHBA-së.
Në fakt, një pyetje e tillë nuk ishte as e nevojshme. Politika është e qartë dhe e publikuar në faqen e OKB-së, ku janë listuar edhe figura si Fidel Castro, Nicolás Maduro apo Robert Mugabe – të cilët, megjithëse “non grata” në SHBA, janë ftuar për ngjarje zyrtare të OKB-së në emër të vendeve të tyre.
Kësisoj, informacioni i marrë mund të ishte siguruar falas, pa pasur nevojë për miliona dollarë në lobim.
Sa për tani, Berisha s’mund të udhëtojë për një tjetër arsye: të premten mbrëma shfaqet te emisioni “Opinion” i Blendi Fevziut. Le të shpresojmë që Departamenti i Shtetit do të presë të paktën deri të hënën.
