Emigrantët pasi kanë kaluar festat e fundvitit pranë familjeve të tyre kanë filluar rikthimin në vendet e e punës në vendin fqinjë.
Në pikën e kalimit kufitar të Kapshticës situata paraqitet e qetë në këtë fillim viti, teksa janë marrë të gjitha masat për përballimin e fluksit të lëvizjeve i cili pritet të rritet në ditët në vijim. Aktualisht në këtë pikë kalimi është duke u punuar me 3 sportele në dalje dhe 2 në hyrje. Burime nga Drejtoria Vendore e Kufirit dhe Migracionit në Korçë bëjnë me dije se përmes pikës së kalimit kufitar të Kapshticës gjatë 24 orëve të fundit kanë hyrë 1493 shtetas shqiptarë e të huaj dhe kanë dalë 3594 shtetas.
E qetë paraqitet situata edhe në Qafë Thanë, ku sipas të njëjtave burime nga kjo pikë kalimi kanë hyrë 1961 shtetas dhe kanë dalë 3334 të tjerë. Pritet që fluksi i lëvizjeve në dy pikat kufitare të juglindjes të jetë i lartë në ditët në vijim.
