Të nderuar kolegë, gjeni më poshtë njoftimin për Tirana Pride 2025.
Për çdo detaj më kontaktoni.
Me 25 Maj, ora 17:00 @ Reja, marshojmë së bashku në Tirana Pride për besimin tonë të palëkundur se çdo individ meriton të jetojë i lirë dhe pa frikë. Marshojmë për të sfiduar urrejtjen që nuk arrin të na mposhti dhe solidaritetin e guximin me të cilin ecim kryelartë e të patrembur rrugëve të çdo qyteti.
Marshojmë për dashurinë dhe mirëkuptimin që lulëzon në familjet tona, për pranimin dhe mbështetjen e miqve dhe aletëve tanë, për shpresën e pashuar se një ditë Shqipëria do jetë shtëpia mikpritëse e çdo personi, pavarësisht orientimit seksual apo identitetit gjinor.
Më 25 Maj, marshojmë në Tirana Pride më të bashkuar se kurrë për të deklaruar me një zë të fuqishëm se dashuria jonë nuk njeh kufij dhe se kauza jonë nuk do pushojë së ekzistuari derisa çdo anëtar i komunitetit tonë të jetë i lirë të jetojë e dashurojë pa frikë e pa gjykim.
Le të marshojmë përpara, jo vetëm më 25 Maj, por çdo ditë, me pasion në zemrat tona dhe vendosmëri në shpirtrat tanë. Le të jemi feneri i shpresës për ata që janë ende në kërkim të pranimit. Dhe të mos harrojmë kurrë se dashuria gjithmonë do të triumfojë mbi urrejtjen.
Jemi krenarë, jemi të fuqishëm dhe së bashku jemi të pandalshëm.
Gëzuar Paradën e Krenarisë.
