Në moshën 71-vjeçare, Skender Rusi sjell përmbledhjen me poezi të zgjedhura “Dalëngadalë unë po bëhem ikje”. Promovimi i librit u bë në Muzeun e Artit Mesjetar të Korçës, ku u lexuan vargjet e ndjera të lirikut. Ai u vlerësua me çertifikatë mirënjohje nga Universiteti Fan Noli.
Vargjet e poetit lirik Skënder Rusi, shoqëruar me tingujt e violinçelës dhuruan emocione të papërshkueshme për dashamirësit e poezisë, që mbushën Muzeun e Artit Kombëtar Mesjetar të Korçës.
“Dalëngadalë unë po bëhem ikje” titullohet përmbledhja poetike që u promovua në vendlindjen e potetit, i cili në 5 dekada ka shkruar 26 libra. Edhe pse në gjendje jo të mirë shëndetësore, poeti i madh interpretoi disa vargje të ndjera.
“Dhe vjen një çast që në këtë anije s’do jem…
“Unë i dhashë asaj lavdinë ajo më tha vdekjen”
I biri, Eris Rusi, në rolin e redaktorit letrar u shpreh se “Dalëngadalë unë po bëhem ikje” është veç një metaforë, pasi poetët e kanë fituar përjetësinë.
“Poetët nuk ikin asnjëherë, sepse poezia mbetet përgjithmonë”.
Më tej referoi dekanja e Fakultetit të Edukimit, Jonela Spaho, e cila i dorëzoi Skënder Rusit, titullin “Mirënjohje e Universitetit Fan Noli”.
“Për kontributin gjysmë shekullor në letërsi”.
Skënder Rusi ka lindur në vitin 1952 në Korçë dhe ka një krijimtari të pasur letrare. Krijimet e tij janë përfshirë në antologjitë e disa vende të Evropës si Gjermani, Zvicër. Po kështu ka qenë Kryetar i Klubit të Shkrimtarëve “Bota e Re” dhe drejtues i disa aktiviteve letrare.
Po ashtu edhe kryebashkiaku i bashkisë Korçë, Sotiraq Filo, nuk e ka anashkaluar promovimin e librit të një prej lirikëve më të mirë që ka qyteti i Korçës, ja çfarë ka shkruar ai në faqen sociale facebook;
“Promovohet libri i ri i lirikut të mirënjohur korçar Skënder Rusi.
Në ambientet e Muzeut të Artit Mesjetar, nën një atmosferë magjike, përmes interpretimit të poezive është promovuar dje botimi i 26-të i lirikut Skënder Rusi.
Tepër emocionuese këtë mbrëmje e bëri edhe interpretimi i një prej poezive nga vet autori, i cili ka hyrë në panoramën artistike të vendit tonë duke u bërë simbol i poezisë lirike bashkëkohore”.
