Një korçar me ‘sëmundjen’ e shëndetshme të natyrës, Kristaq Grabocka, 75 vjeçari që e bën plazhin që në janar dhe nuk njeh moshë.
Një thirrje telefonike mesditën e fundjavës mund të të mbetet edhe pa përrgjigje. Vonon pak, por nga ana tjetër përgjigjet Kristaq Grabocka, një korçar nga më të apasionuarit për ngjitjet në mal.
‘Jemi në vendin e shenjtë Dobërgorë së bashku me miqtë dhe akualisht po shijojmë drekën’ thotë Kristaq Grabocka, teksa ora shënon rreth 16.00 e të dielës së 9 qershorit. Kiçi, siç njihet shkurt me emër në Korçë, shton se bashkë me ‘grupin’ kanë qënë së pari në Dardhë, prej andej kishin si destinacion fshatin e njohur të Sinicës, por bllokimi i rrugës për këtu për shkak të punimeve i detyroi të stacionohen në Dobërgorë.
Javën e kaluar ai dhe miqtë e tij ishin në Bradvicë të Devollit ku festohej Shën Konstandini dhe Elena. Nga fotot e publikuara prej andej, Kristaq Grabocka shfaqet me një trup atleti dhe krejt të tonifikuar nga dielli, a thua se vjen prej ndonjë pushimi më shumë se një mujor në plazhet e Amerikës Latine.
‘Unë plazhin e filloj që në dimër, kur bie dëborë, tani që fillon vera e kam përfunduar’ thotë si me humor Kristaq Grabocka. Ai ka aritur moshën 75 vjeç, por tregon po aq sa kur doli në pension si punonjës në bashkinë e Korçës.
Ngjitjet në mal dhe pasionin e këtij sporti e ka filluar aty nga viti 1985. Tani kur po bëhen rreth 4 dekada as që mendon të ndalet, përkundrazi. ‘Na u bë si sëmundje ky sport, nuk mund të rrimë pa u ngjitur në mal’ thotë Grabocka. Ai shton se për fundjavë është e pa diskutueshme organizimi në grup dhe përshkrimi i dhjetra kilometrave në natyrë në destinacione nga më të ndryshmet në zonën e Korçës. Të përditshme i ka ngjitjet mbi Korçë, në një distancë deri në 15 kilometra vajtje dhe kthim.
Afro 40 vite i dashuruar me natyrën dhe malin, Kristaq Grabocka mbetet një nga korçarët më jetëgjatë në këtë sport. Dhe po aq model i një njeriu të urtë e qytetar, që pa dyshim ja ka falur edhe bashkëjetesa e gjatë dhe e harmonishme me natyrën.
