Kryedemokrati Basha ka mbledhur paraditen e sotme grupin e punës, e fill pas tij, ka takuar edhe aleatët, për të diskutuar mbi propozimin për ndryshimin e Kushtetutës me qëllim vettingun në politikë. Basha ka sqaruar se nisma për vettingun në politikë është një nga 4 shtyllat e platformës së përbashkët të opozitës. Për secilën nga pikat deputetët e opozitës janë ndarë në 4 grupe pune.

KPK ka zhvilluar sot seanca për gjyqtaren Mirela Fana, e cila nuk është paraqitur në sallë. Gjithsesi, komisioneri publik, kërkon gjykimin në mungesë për ish-gjyqtaren e Gjykatës së Lartë. KPK, pas dorëheqjes së saj nga ky post në janar të 2018-ës, ndërpreu procesin e vettingut. Por ky vendim u ankimua nga komisioneri publik, që e ka konsideruar jo të drejtë, pasi Fana ka statusin magjistrate.

Ka nisur mbledhja e grupit parlamentar të PS. Burime nga grupi i deputetëve thanë se Kryetari Balla, ka folur mes të tjerash edhe për propozimin e PD, për vetting-un në politikë. Ai ka theksuar se ky propozimi i Bashës është thjesht propagandë politike, e destinuar të dështojë. "Ne jemi gati për vetting të vërtetë dhe reforma në drejtësi e garanton 100% atë”, mësohet të jetë shprehur Balla.

Komisioni i Pavarur i Kualifikimit ka shkarkuar nga detyra Prokurorin e Apelit të Durrësit, Bujar Hoti. Vendimi u mor pas hetimeve të zhvilluara nga komisioni i përbërë nga anëtarët: Lulzim Hamitaj, Olsi Komici dhe relatorja Brunilda Bekteshi. Hoti ishte pjesë e listës prioritare të vetting-ut për shkak të kandidimit të tij për Këshillin e Lartë të Prokurorisë.

Lulzim Basha vijon të këmbëngulë me nismën më të re të PD-së, atë të Vettingut në politikë. Ai ka cituar Prokurorin e antimafias italiane, Paulo Borselino, i vrarë nga mafia në 1992-shin. “Ekziston një keqkuptim bazë sipas të cilit politikani që shoqërohet me mafiozë, nëse nuk dënohet nga gjykata, është i ndershëm! Jo! Është detyrë e institucioneve që të flakin politikanët e afërt me Mafian", shkruan Basha.

Kolegji i Posaçëm i Apelimit do të shqyrtojë në datën 25 shtator ankimimin e gjyqtarit të gjykatës Kushtetuese Fatmir Hoxha, i cili u shkarkua nga detyra nga KPK në datën 10 maj. Trupa gjykuese përbëhet nga Kryesues Albana Shtylla, Relatore Ina Rama dhe anëtarë Luan Daci, Natasha Mulaj dhe Rezarta Schuetz.

Kolegji i Posaçëm i Apelimit ka hedhur shortin ditën e sotme, për trupën gjykuese që do të shqyrtojë ankimimin e ish-prokurorit të Apelit, Gentian Trenova, i cili u shkarkua nga detyra. Trupa gjykuese që do të shqyrtojë kërkesën e tij përbëhet nga Ina Rama, si kryesuese, Natasha Mulaj, si relatore dhe anëtarët Albana Shtylla, Ardian Hajdari dhe Luan Daci.

Kryeministri Rama thotë se është dakord me PD-në me nismën për Vetting-un e politikanëve. Gjithashtu, ai pohoi se është gati për t'u ulur në tryezë me Kryetarin e PD-së për këtë çështje. "S'jemi këtu për të mundur Lulin. Meqë ra fjala tek Luli, po bën po atë gabim që bëri. Por unë jam shumë dakord për Vetting-un", ka thënë ai.

Presidenti Meta preferoi të tregohej i rezervuar për të dhënë një koment lidhur me inciativën e PD-së që pritet ta dorëzojë në Kuvend për Vetting-un e politikanëve, Kryeministrit, Ministrave dhe Kryetarëve të Bashkisë. "Nuk kam asnjë koment për këto iniciativa, shpresoj në një bashkëpunim dhe lexim të përbashkët të atyre sfidave me të cilat duhet të përballohet politika shqiptare", ka cituar ai.

Kolegji i Posaçëm i Apelimit ka bërë publike trupën gjykuese që do trajtojë ankimin e prokuronit Luan Kaloçi, pas shkarkimit nga detyra nga KPK. Trupi gjykues për çështjen e Kaloçit u caktua me short. Kryesuese e trupës është caktuar Rezarta Schuetz, ndërsa relatore e ankimimit të Kaloçit për KPK, Natasha Mulaj.