Shoqëria “sugar daddy”
Këtë term e kisha dëgjuar, e dija çfarë ishte por deri dje e mendoja se ishte larg Shqipërisë. Sot mendoj të kundërtën.
Piva kafen e mëngjesit në fshat, shkova në kishë në Libonik. Pas kishe, takoj në Korçë një shoqe që kisha nja 4-5 vite pa e parë. Ulemi për një kafe të shpejtë.
Ty ka ecur puna mirë, nga të gjithë ne, ke ecur goxha. Bravo – po më thoshte
Që mos fokusohej biseda tek unë, e pyes se çfarë punë po bënte.
-Unë punë? Hiç mo. Asgjë
Si moj asgjë. Ti me Q8 jashtë, gjithë këto rroba të bukura.
-Kam zënë një plakush mo. Sugar daddy.
Si me si?
-Po pra, siç e dëgjove. Sugar daddy. E takoj njëherë në muaj ose dy herë. Ai më bleu makinën, më mori dhe një apartament në Durrës. Normal më jep e lek.
Nuk po bën shaka?
-Jo pra. Pse të bëj shaka?
Po nuk e ke problem këtë stil jetese?
-Ore problem duhet ta kesh ti qe ngrihesh që në 7 dhe je 24 orë në punë, jo unë. Unë jam rehat.
Po nuk ke turp kur e thua? Dmth nuk te bezdis fakti që mund të të gjykojnë të tjerët?
-Po kështu mo është bërë gjysma e Tiranës. Unë kam e 3-4 shoqe të tjera që nuk punojnë, kemi nga një bizesmen për kokë, bëjmë pushime bashkë, dalim.
Kaq e lehtë është?
-Mjafton mos e bezdisësh me telefonata, mos bësh foto me të, të përgjigjesh në çdo sekondë kur të telefonon dhe je OK.
Vazhdoi biseda, ngrihem paguaj kafet dhe kthehem ta takoj
-Po çne ti me rrogë bre që paguan kafet? Ti je hallexhi, i paguante shoqja jote – ma thotë me ironi “të butë”
Po bëja një analizë të shkurtër në mendje ndërkohë që po kthehesha në shtëpi.
Këtu në Shqipëri gjithë shoqëria është sugar daddy! – kështu të paktën gjykoj unë.
Këtu media promovon Megi Pojanin që aftësia kryesore (jo e vetmja) e saj është trupi bombastik dhe pikërisht Megi paguhet më tepër se një receptioniste, ekonomiste, drejtoreshë, gazetare në terren, infermiere, mjeke.
Këtu Cllevio, Kozak, tik toksat paguhen më tepër se profesionet. Këtë promovon media shqiptare. Këtë promovojmë në rrjetet sociale. Një i ri influencohet nga këta. Patjetër.
Kur ne nuk bëjmë hero infermierin, doktorin, politikanin e ndershëm, gazetarin e pashitur – por “sugar daddy – it”, kështu po bëhemi, SHOQËRIA SUGAR DADDY
(biseda është postuar me leje)
Nga Xhensil Shkembi
