Sot shënohet 123-vjetori i lindjes së Misto Cicit, mjeshtrit të fotografisë artistike, i cili i la Pogradecit dhe gjithë Shqipërisë një trashëgimi të çmuar kulturore. Me aparatin e tij, Cici dokumentoi çdo ngjarje që nga viti 1915 deri në vitin 1978, duke e kthyer fotografinë në art dhe historinë e qytetit në kujtesë të gjallë.
Në arkivin e tij ndodhen qindra foto që dëshmojnë jetën shoqërore, kulturore e historike të Pogradecit: nga ngritja e trupës gjimnastikore në 1916, te vizita e Fan Nolit në 1924 dhe çlirimi i qytetit më 30 gusht 1944. Ai ka fiksuar gjithashtu peizazhe mahnitëse të liqenit, pyllit të gështenjave, lagjeve karakteristike e festave tradicionale.
Fotografitë bardhë e zi të Misto Cicit janë një dëshmi e rrallë e ndjeshmërisë së tij artistike. Ai dinte të “pikturonte me dritë”, duke zbërthyer nuancat e natyrës dhe jetës qytetare me një sy poetik e filozofik.
Misto Cici ishte mik i ngushtë i Vangjush Mios, me të cilin ndante dashurinë për liqenin dhe peizazhin e Pogradecit. Në vitin 1925, ai u ftua në Milano për të stampuar 12 foto artistike që prezantonin Shqipërinë turistike dhe u nderua me çmimin prestigjioz “Ferrari” për fotografinë artistike.
Sot, trashëgimia e tij ruhet me kujdes nga familjarët, ndërsa emri i tij mbetet i gdhendur në historinë e kulturës shqiptare si “Qytetar Nderi” i Pogradecit dhe mjeshtër i dritës, kujtesës e artit fotografik.
