Qendra Shëndetësore Verore në Pogradec ka nisur zyrtarisht ofrimin e shërbimeve për qytetarët dhe pushuesit që vizitojnë qytetin gjatë sezonit turistik. Kjo qendër do të qëndrojë në funksion deri më 30 shtator, duke ofruar kujdes shëndetësor 24 orë në ditë, 7 ditë të javës.
E pozicionuar për të përballuar fluksin e shtuar gjatë muajve të verës, Qendra Verore është e pajisur me staf të specializuar mjekësh dhe infermierësh, të cilët do të jenë në gatishmëri të vazhdueshme për të garantuar ndihmën e nevojshme mjekësore në çdo kohë.
“Ekipi profesionist dhe i përkushtuar i kësaj qendre do të qëndrojë gjithmonë pranë qytetarëve dhe vizitorëve për të siguruar një sezon të shëndetshëm dhe të sigurt,” thuhet në njoftimin zyrtar të Njêsisë Vendore të Kujdesit Shëndetësor Pogradec.
Qendra Shëndetësore Verore është një pjesë e rëndësishme e strategjisë së kujdesit shëndetësor gjatë sezonit turistik, duke kontribuar në përmirësimin e sigurisë dhe mirëqenies së të gjithë atyre që zgjedhin Pogradecin si destinacionin e pushimeve verore.
