Në kuadër të përgatitjeve për sezonin veror 2025, Shërbimi i Epidemiologjisë dhe Shëndetit Mjedisor pranë Njësisë Vendore të Kujdesit Shëndetësor Korçë ka zhvilluar kontrolle të përqendruara në subjektet që ofrojnë shërbime pishine në rrethin e Korçës. Qëllimi i këtyre inspektimeve ka qenë garantimi i standardeve higjieno-sanitare dhe mbrojtja e shëndetit të përdoruesve të këtyre ambienteve.
Gjatë kontrolleve janë kryer analiza laboratorike për të verifikuar cilësinë e ujit në pishina, si dhe është inspektuar funksionimi i sistemeve të filtrimit dhe dezinfektimit. Një tjetër element i rëndësishëm ka qenë edhe verifikimi i dokumentacionit teknik dhe atij higjieno-sanitar, për të siguruar përputhjen me kërkesat ligjore dhe standardet shëndetësore në fuqi.
Kontrollet do të vijojnë gjatë gjithë sezonit turistik, me qëllim ruajtjen e sigurisë dhe mirëqenies së qytetarëve dhe pushuesve që zgjedhin të frekuentojnë këto ambiente gjatë muajve të verës.
