Në një verë me temperatura të larta në të gjithë vendin, Voskopoja po kthehet në strehën e preferuar për pushuesit që kërkojnë freski dhe qetësi larg vapës urbane. Ky fshat historik në juglindje të Shqipërisë po tërheq gjithnjë e më shumë të moshuar dhe turistë, të cilët e vlerësojnë klimën e butë malore, ajrin e pastër dhe peizazhet piktoreske.
Sipas operatorëve turistikë, përveç klimës së favorshme, Voskopoja ofron edhe pasuri të jashtëzakonshme kulturore dhe historike, që nga kishat dhe manastiret shekullore deri tek mikpritja tradicionale dhe kuzhina vendase.
Sipas tyre, interesi për Voskopojën po rritet çdo vit, veçanërisht nga turistët e huaj që vijnë për të zbuluar historinë dhe trashëgiminë kulturore të zonës, si dhe nga familjet që duan të kalojnë pushime të qeta në natyrë.
Përveç relaksit dhe klimës së freskët, Voskopoja mbetet një nga vendet me vlera të mëdha kulturore dhe shpirtërore, duke u konsideruar një thesar i trashëgimisë kombëtare shqiptare.
