Një tjetër fazë e operacionit policor të koduar “The Wanted” është finalizuar me sukses nga Policia e Korçës, duke çuar në pranga tre shtetas të shpallur më herët në kërkim për veprimtari kriminale në fushën e narkotikëve.
Operacioni është zhvilluar nga specialistët për Hetimin e Narkotikëve në bashkëpunim me Forcën e Posaçme “Shqiponja”, mbi bazën e informacioneve operative dhe burimeve konfidenciale.
Të arrestuarit janë:
- J. Xh., 29 vjeç, banues në Korçë – i dënuar me 7 vjet burgim, nga të cilat i mbeten për të vuajtur edhe 2 vjet, 10 muaj e 15 ditë;
- P. K., 34 vjeç, banues në Korçë – i dënuar me 7 vjet e 6 muaj burgim, me 2 vjet, 1 muaj e 16 ditë të pashlyera;
- E. C., 35 vjeç, banues në Korçë – i dënuar me 8 vjet burgim, nga të cilat i mbeten 3 vjet, 4 muaj e 20 ditë.
Të tre shtetasit ishin shpallur në kërkim në kuadër të operacionit të mëparshëm policor “Knock Down 2” dhe janë kapur në zonën urbane të qytetit të Korçës.
Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Korçë, për vijimin e veprimeve ligjore.
Policia e Korçës thekson se operacionet për kapjen e shtetasve në kërkim penal do të vijojnë pa ndërprerje.
