Galeria e Arteve Digjitale në Korçë u pasurua me një risi të veçantë që lidh teknologjinë me kulturën: hapësira imersive “KubFranceKorça”, një projekt inovativ që sjell artin dhe trashëgiminë franceze përmes realitetit virtual (VR).
Ky instalacion unik ofron një përvojë krejtësisht të re për vizitorët e çdo moshe, duke i mundësuar të “udhëtojnë” në universin francez të artit, historisë dhe kulturës në mënyrë interaktive dhe moderne.
Projekti është pjesë e programit KitKubiK dhe realizohet në bashkëpunim me KubFranceTirana, operator i Ambasadës së Francës në Shqipëri. Pas suksesit në Tiranë, Korça bëhet qyteti i dytë në vend që mirëpret këtë risi kulturore, duke dëshmuar edhe një herë rolin e saj si një qendër e rëndësishme e inovacionit dhe krijimtarisë digjitale në rajon.
Ky bashkëpunim franko-shqiptar përforcon marrëdhëniet kulturore dhe arsimore mes dy vendeve, ndërthur traditën me teknologjinë moderne dhe krijon hapësira të reja që frymëzojnë brezat e rinj drejt artit dhe dijes.
Me “KubFranceKorça”, qyteti i serenatave jo vetëm që ruan trashëgiminë e tij të pasur kulturore, por edhe e çon përpara, duke e shndërruar Korçën në një qendër të inovacionit digjital dhe kulturës europiane.
