Në datën 1 korrik 2026, në mjediset e Fakultetit të Bujqësisë të Universitetin “Fan S. Noli”, u zhvillua një leksion i hapur mbi përcaktimin e mbetjeve të pesticideve në mollë, i mbajtur nga prof. dr. Aurel Nuro. Gjatë këtij takimi, u trajtuan metodat bashkëkohore të analizës së këtyre mbetjeve përmes teknikave LC dhe GC, duke u ndalur në të gjithë procesin analitik, që nga marrja e mostrës e deri te interpretimi dhe raportimi i rezultateve.
Të pranishëm në këtë aktivitet ishin stafi akademik, studentë, si dhe specialistë të bujqësisë në rajonin e Korçës. Gjatë diskutimeve, vëmendja kryesore u fokusua te rëndësia e analizave laboratorike për të garantuar sigurinë ushqimore. Pjesëmarrësit theksuan gjithashtu nevojën për kontrollin e cilësisë dhe përmbushjen e standardeve të kërkuara në sektorin agro-ushqimor.
Inspektimi i pajisjeve laboratorike
Pas përfundimit të leksionit, takimi vijoi me një inspektim të pajisjeve laboratorike në Laboratorin e Kimisë dhe Agroushqimit të Fakultetit të Bujqësisë. Konkretisht, u panë nga afër pajisjet Gas Chromatography (GC) dhe High-Performance Liquid Chromatography (HPLC).
Gjatë këtij inspektimi, të pranishmit diskutuan mbi gjendjen aktuale, funksionalitetin dhe mundësitë e përdorimit të këtyre pajisjeve. U vlerësua rëndësia e tyre jo vetëm për analizat laboratorike dhe kërkimin shkencor, por edhe për mbarëvajtjen e procesit mësimor në këtë fakultet.
