“98 vjeç. Ama si i ri? Epo tamam, dhëmbët nuk na kanë dalë akoma. Jam i ri, për veten time, bëj këtë rrugë, punoj me duart time, këmbët time, jam i ri”
Ky është Hamdi Cengëtari, “atleti” 98 vjeçar nga fshati Çetë e Devollit. Çdo ditë rituali i tij është ecja drejt fshatit të Qytezës, duke ecur plot 14 km në ditë.
“Ku vete? Në Qytezë. Nuk lodhem jo. Ku di unë si ka mundësi, të gjithë çuditen. Nga këmbët nuk përtoj hiç, vetëm nga sytë sikur po plakem, por gjerat e tjera jam shumë në rregull.
Që në mëngjes shkoj në qytezë, kthehem, ha buke, pi kafen, pas orës dy dal gjende e kthehem”.
I riu “98 vjeçar tregon se moshat e reja e kanë mendjen tek teknologjia, duke lënë mënjanë aktivitetin fizik.
“Çfarë ha ti që ecën kaq thonë? Barku s të dhemb, asgjë s’të dhemb, si ka mundësi… po unë kam e shokë që janë më të rinj se unë e janë të sëmurë”
Mesazhi i Hamdiut që kockën e mendjen e ka të fortë është ky.
“Të rinjve mesazhi im është që të shohin kokën, të punojnë për shtëpi, për vendin e tyre dhe të mos e kenë mendjen as për telefon, as per jashtë. Jashtë është kurbet por strumbullari është këtu, duhet të punojnë”
Hamdiu përsëri do të ecë me hapat e tij të ngadaltë, për të mbajtur trupin e mendjen në formë e për të dëshmuar se aktiviteti fizik bën që mosha të mos ketë rëndësi
