Një fermë model për kultivimin e mollëve, e pajisur me teknologjitë më të fundit, si dhe një qendër moderne për seleksionimin dhe paketimin e tyre, do të ngrihet në qytetin e Korçës si investim i bashkisë, me synim rritjen e konkurrueshmërisë së prodhimit vendas dhe zgjerimin e tregjeve për fermerët.
Kryetari i bashkisë së Korçës, Sotiraq Filo, në një intervistë për mediat, theksoi se projekti pritet të nisë zbatimin e tij gjatë vitit të ardhshëm dhe vlerësohet si një ndër investimet më të rëndësishme në mbështetje të bujqësisë në këtë zonë.
Sipas Filos, molla është një nga produktet bujqësore me potencial të lartë për Korçën, ndaj ky projekt do të krijojë kushtet për trajtimin e saj sipas standardeve bashkëkohore.
“Ky projekt është shumë i rëndësishëm, sepse do të krijojë mundësinë për zhvillimin e tregut të mollës, e cila vlerësohet me potencial të madh për bujqësinë dhe fermerët e Korçës. Përmes seleksionimit dhe paketimit sipas standardeve, fermerëve do t’u krijohet mundësia që produkti të ketë akses edhe në tregjet ndërkombëtare”, u shpreh kryebashkiaku.
Ai shtoi se ferma model do të shërbejë edhe si pikë reference për fermerët e zonës, duke ofruar praktika të reja kultivimi dhe përdorimin e teknologjive bashkëkohore, ndërsa qendra e seleksionimit dhe paketimit do të garantojë cilësi të qëndrueshme dhe rritje të vlerës së produktit.
Projekti pritet t’i japë një hov të ri zhvillimit të sektorit bujqësor në Korçë, duke forcuar zinxhirin e prodhimit dhe tregtimit të mollës, si dhe duke kontribuar në rritjen e të ardhurave për fermerët e zonës.
Qarku i Korçës është zona kryesore e kultivimit të mollëve në Shqipëri, duke zënë një pjesë shumë të madhe të prodhimit kombëtar. Sipas të dhënave nga Ministria e Bujqësisë dhe Zhvillimit Rural, Korça kontribuon me rreth 63% të totalit të prodhimit të mollëve në vend në grupin e frutave me fara, ku molla përbën pjesën kryesore të këtij segmenti të frutave të pemës.
Kjo traditë e kultivimit të mollëve bazohet në kushtet e favorshme klimatike të zonës, duke e bërë Korçën një lider produktiv në sektorin e frutave në Shqipëri.
Në nivel kombëtar, qarku i Korçës është një nga zonat me sipërfaqe të konsiderueshme të mbjellë me mollë, deri në rreth 4000 hektarë, ku mjaft fermerë kultivojnë varietete të ndryshme të këtij fruti.
Varietetet më të kultivuara përfshijnë derivatet e Red Chief dhe Starking, si dhe Golden Delicious, varietete që zënë një pjesë të madhe të kësaj kulture në shkallë vendi.
Një pjesë e madhe e mollëve të Korçës përdoret për tregun vendas, por gjithnjë e më shumë pjesë e prodhimit shkon drejt tregjeve të huaja, duke rritur potencialin eksportues të sektorit./ATSH
