Shërbimet e Komisariatit të Policisë Devoll kanë zbuluar një lokal në qytetin e Bilishtit, i cili ishte vënë në dispozicion të organizimit të kundërligjshëm të lojërave të fatit. Operacioni u zhvillua në bazë të informacioneve të siguruara në rrugë operative, ndërsa në përfundim të veprimeve procedurale u arrestuan administratori dhe menaxheri i lokalit.
Në pranga ranë shtetasit P. M., 45 vjeç, banues në Bilisht, i akuzuar për veprat penale “Organizimi ose ushtrimi i lojërave të fatit”, “Vënia në dispozicion e lokaleve për lojëra fati”, “Fshehja e të ardhurave” dhe “Punësimi i paligjshëm”; si dhe E. M., 26 vjeç, i punësuar në mënyrë të paligjshme si menaxher, i cili akuzohet për organizim të lojërave të fatit dhe fshehje të të ardhurave.
Gjithashtu, Prokurorisë së Korçës iu referuan materialet për fillimin e procedimit penal ndaj shtetasve E. U., 25 vjeç, dhe F. M., 23 vjeç, të kapur në ambientet e lokalit duke luajtur lojëra fati.
Gjatë kontrollit, policia gjeti dhe sekuestroi pajisje elektronike që shërbenin për ushtrimin e aktivitetit të paligjshëm, si dhe bileta sportive, të cilat u morën në cilësinë e provës materiale.
Materialet procedurale u referuan Prokurorisë së Korçës për veprime të mëtejshme hetimore.
