Në kuadër të Ditës Botërore të Hospis dhe Kujdesit Paliativ, me moton “Akses Universal për Kujdes Paliativ”, më 11 tetor 2025 u zhvillua në Korçë një aktivitet sensibilizues që bashkoi përfaqësues të pushtetit vendor, institucione shëndetësore, organizata bashkëpunuese dhe përfitues të shërbimeve.
Në një atmosferë mirënjohjeje dhe solidariteti, Kryetari i Qarkut Korçë, z. Petrika Tollkuci, nderoi me Certifikatë Përkushtimi dhe Emblemën e Qarkut organizatën “Little Company of Mary”, për kontributin e saj të çmuar ndër vite në ofrimin e kujdesit paliativ. Çmimi u pranua me përulje nga Motër Anita MacDonald, themeluese dhe mbështetëse e përhershme e këtij shërbimi.
Kryetari i Bashkisë Korçë, z. Sotiraq Filo, në fjalën e tij përshëndetëse, vlerësoi përkushtimin dhe punën e palodhur të stafit në shërbim të pacientëve, duke theksuar rëndësinë e vazhdimësisë së këtij misioni human dhe mbështetjen e mëtejshme nga Bashkia e Korçës.
Gjatë aktivitetit u ndanë histori prekëse nga përditshmëria me pacientët, u përcollën mesazhe sensibilizimi dhe momente reflektimi që sollën në vëmendje faktin se kujdesi paliativ është më shumë se trajtim mjekësor – është një prekje njerëzore që mbart shpresë, dinjitet dhe dashuri.
