Me ardhjen e stinës së verës dhe rritjen e temperaturave, Korça dhe zonat përreth saj po shndërrohen në një nga destinacionet më të kërkuara të turizmit malor në Shqipëri. Turistë vendas dhe të huaj po zgjedhin gjithnjë e më shumë juglindjen për të shijuar natyrën, kulturën, historinë dhe freskinë që ofron ky rajon.
Guida turistike Nuredin Nazarko tregon se tashmë janë disa agjenci që po organizojnë ture për turistë nga vende të ndryshme europiane. Ai thekson se interesimi është në rritje, sidomos për aktivitetet në natyrë si ecjet malore, vizitat në fshatrat karakteristikë, eksplorimet kulturore dhe gatimet tradicionale.
“Janë grupe nga Zvicra, Australia, Londra, Franca, që kanë ardhur me interes për të njohur zonën. Po qëndrojnë për disa ditë dhe janë të mahnitur nga natyra, mikpritja dhe ushqimi,” tha Nazarko.
Përveç të huajve, edhe pushues nga qytete të ndryshme të Shqipërisë si Tirana, Elbasani, Durrësi dhe Lushnja kanë zgjedhur Korçën si një vendpushim të përshtatshëm për shkak të klimës së freskët dhe qetësisë larg zhurmës së qyteteve të mëdha.
Fluksi më i madh i turistëve pritet gjatë muajve korrik dhe gusht, kur nisin edhe pushimet vjetore për administratën dhe institucionet publike. Me infrastrukturën që përmirësohet vit pas viti dhe ofertën turistike që zgjerohet, Korça po e forcon gjithnjë e më shumë profilin e saj si një nga destinacionet kryesore malore në vend.
