Në Policinë e Shtetit ka nisur zyrtarisht procesi i rifreskimit të kupolës drejtuese, një procedurë e hapur nga Drejtori i Përgjithshëm, Ilir Proda, sipas ligjit për funksionimin e Policisë së Shtetit. Mes qarqeve që pritet të kenë ndryshime të rëndësishme është edhe Korça, ku drejtimi i Drejtorisë Vendore të Policisë është vakant pas shkarkimit të Erjon Ahmetit për rezultate të pakënaqshme.
Sipas listës së oficerëve që kanë aplikuar për pozicionet drejtuese, një nga emrat më të përfolur për marrjen e drejtimit të Policisë së Korçës është oficeri Uljan Shpataraku, me mbi 15 vite eksperiencë në strukturat policore. Shpataraku vlerësohet si një ndër kandidatët potencialë për të marrë në dorë këtë detyrë, në një moment kur Policia e qarkut ka nevojë për rikthim të performancës dhe rritje të eficiencës operacionale.
Procesi i aplikimeve përfshin edhe emra të tjerë të njohur nga radha e oficerëve të karrierës, mes tyre Loard Sallaku, Islor Islami, Alban Çela dhe Dritan Lena. Megjithatë, në fokusin e këtij rifreskimi mbeten qarqet Elbasan, Korçë dhe Shkodër, ku priten emërime të reja në ditët në vijim.
Në Shkodër, aktualisht detyrën e drejtorit të komanduar e mban Gentian Berberi, i cili vitin e kaluar rezultoi fitues në garën për drejtimin e Policisë së Kukësit. Ndërkohë, Sallaku, me 21 vite eksperiencë dhe aktualisht drejtor i komanduar në Kukës, shihet si kandidati kryesor për qarkun e Elbasanit.
Për Korçën, vendimi pritet me interes të lartë, pasi drejtuesi i ri do të ketë përpara sfida të rëndësishme, nga menaxhimi i rendit publik, tek rritja e sigurisë dhe forcimi i bashkëpunimit me komunitetin.
