Një tjetër rast i kontrabandës së mallrave është goditur nga policia në qarkun e Korçës. Gjatë një operacioni të zhvilluar në aksin rrugor “Kapshticë–Bilisht”, shërbimet e Policisë ndaluan një automjet që transportonte mallra të dyshuara të kontrabanduara nga Greqia, duke arrestuar në flagrancë drejtuesin e mjetit.
Sipas burimeve zyrtare, në automjetin e drejtuar nga shtetasi N. J., 53 vjeç, banues në Greqi, u gjetën pajisje të ndryshme hidrosanitare dhe elektrike, me vlerë rreth 2000 euro, të cilat dyshohet se ishin futur në territorin shqiptar pa iu nënshtruar procedurave të zhdoganimit.
Për këtë rast, 53-vjeçari u arrestua në flagrancë dhe po hetohet për veprën penale “Kontrabanda me mallra të tjera”.
Ndërkohë, është proceduar penalisht edhe shtetasi N. B., 64 vjeç, doganier në Pikën e Kalimit Kufitar Kapshticë, pasi dyshohet se ka shpërdoruar detyrën duke mos kryer veprimet e nevojshme për zhdoganimin e mallrave.
Mallrat e kontrabanduara dhe automjeti u sekuestruan si prova materiale, ndërsa materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Korçë, për veprime të mëtejshme ligjore.
