Ministria e Arsimit e Shqipërisë dhe qeveria franceze kanë firmosur një marrëveshje të re bashkëpunimi që synon forcimin e seksioneve dygjuhëshe shqip–frëngjisht në pesë gjimnaze të vendit: “Raqi Qirinxhi”, “Gjergj Kastrioti”, “Luigj Gurakuqi”, “Oso Kuka” dhe “Asim Vokshi”. Marrëveshja përfshin edhe mbështetjen e 20 shkollave 9-vjeçare që zhvillojnë mësim të integruar në gjuhën frënge.
Gjatë takimit me mësuesit e frëngjishtes në arsimin parauniversitar, ministrja e Arsimit Mirela Kumbaro, e shoqëruar nga ambasadorja e Francës në Shqipëri, Catherine Suard, vlerësoi punën e “armatës së jashtëzakonshme” të mësuesve të frëngjishtes në të gjithë vendin, duke nënvizuar se qytetet Korçë, Durrës, Shkodër, Elbasan dhe Tiranë janë bërthama e këtij rrjeti dygjuhësh.
Fokusi i rëndësishëm i marrëveshjes mbetet Korça, ku gjimnazi “Raqi Qirinxhi” prej vitesh ka një seksion aktiv dygjuhësh dhe njihet për rezultate të larta në certifikimet ndërkombëtare DELF. Ministrja Kumbaro theksoi se programet për liceun franko-shqiptar – që pritet të hapet në shtator 2027 – do të përgatisin sot nxënësit që studiojnë në këto gjimnaze, duke hapur mundësi të reja për studime me orientim shkencor, në frëngjisht dhe shqip.
Në deklaratat e saj, ambasadorja Suard u ndal edhe te roli i Korçës, duke e cilësuar traditën frankofone të qytetit një aset të rëndësishëm për marrëdhëniet mes dy vendeve. Sipas saj, liceu franko-shqiptar do të sjellë të rinj frankofonë që do të shërbejnë si ura lidhëse mes Shqipërisë dhe Francës.
Marrëveshja e re synon përmirësimin e cilësisë së mësimdhënies, modernizimin e klasave dhe laboratorëve, rritjen e bashkëpunimit me pedagogë francezë, si dhe zgjerimin e qasjes së mësimit të gjuhës franceze si avantazh për të rinjtë në të gjithë vendin – duke përfshirë edhe Korçën, që mbetet një ndër qendrat më të rëndësishme të këtij rrjeti arsimi dygjuhësh.
