Në teatrin “Andon Zako Çajupi” të Korçës, për dy netë me radhë u vu në skenë muzikali “Katedralja”.
Shfaqja e bazuar në kryeveprën e Viktor Hygoit solli univers të fortë emocional dhe dramatik. Salla e teatrit ishte e tejmbushur dhe në fund të muzikalit, publiku reagoi ngrohtë, duke dhuruar duartrokitje të gjata.
Nën regjinë e Xhuljano Briskut dhe me një kast aktorësh të rinj, publiku përjetoi emocione të fuqishme natën e parë të shfaqjes, ku muzika, lëvizja dhe fjala u bashkuan në një rrëfim intensiv skenik. “Katedralja” do të shfaqet edhe natën e sotme në Teatrin “Andon Z. Çajupi”, duke sjellë përveç risisë artistike edhe më shumë atmosferë festive për Korçën.
Kryetari i bashkisë, Sotiraq Filo, falënderoi artistët, regjisorin dhe gjithë ekipin krijues, të cilët me talent, përkushtim dhe profesionalizëm sollën në skenë një shfaqje të nivelit të lartë, duke e kthyer këtë premierë në një moment të paharrueshëm për publikun dhe për jetën kulturore të qytetit.
“Katedralja” është një histori madhështore dashurie, sakrifice dhe fati, që solli nëpërmjet muzikës dhe interpretimit skenik, simbolin e pavdekshëm të Francës dhe arkitekturës gotike. Notre Dame frymëzoi publikun me historinë e Kuazimodos, Esmeraldës cigane dhe priftit Frollo.
