Nesër do të nisë ndërtimi i urës së tipit “Bailey” në fshatin Qafzezë, një zgjidhje e përkohshme, por e menjëhershme, që do t’i rikthejë kalueshmërinë banorëve të 12 fshatrave të bashkisë Kolonjë. Vendimi u mor pas përcjelljes së shqetësimit tek ministri i Mbrojtjes, Pirro Vengu, dhe kreu i Agjencisë Kombëtare të Mbrojtjes Civile, Haki Çako, me qëllim adresimin e shpejtë të situatës deri në ndërtimin e urës së re përfundimtare.
Institucioni i Prefektit të Qarkut Korçë e trajtoi me prioritet këtë problem, pasi dëmtimi i urës kishte lënë komunitetin pa një lidhje alternative qarkullimi. Për reagimin e menjëhershëm dhe angazhimin e strukturave, janë shprehur falënderime ndaj Ministrisë së Mbrojtjes dhe AKMC-së.
Gjatë ditës së sotme, inxhinieri i Batalionit të Xhenios, së bashku me nënprefektin e Kolonjës, Adriatik Brace, përfaqësues të emergjencave civile të Prefekturës së Korçës, bashkisë Kolonjë dhe inxhinierëve të ARRSH-së, kryen inspektimin në pikën e dëmtuar. Pas vlerësimit teknik u vendos që pikërisht në këtë segment të ndërtohet ura “Bailey”, për të garantuar sa më shpejt qarkullimin e mjeteve dhe lëvizjen e banorëve.
Punimet pritet të nisin menjëherë, me angazhimin maksimal të të gjitha strukturave, ndërsa banorëve u shprehen falënderime për durimin dhe mirëkuptimin.
