Përmbytjet e shkaktuara nga moti i keq kanë sjellë dëme të konsiderueshme në bujqësi, veçanërisht në Bashkinë e Maliqit dhe në të gjithë Qarkun e Korçës. Nga Pogradeci, ministri i Bujqësisë bëri të ditur se procesi i verifikimit të dëmeve është në zhvillim dhe se fermerët e prekur do të dëmshpërblehen.
Sipas ministrit, ekipet e Ministrisë së Bujqësisë, në bashkëpunim me bashkitë dhe Emergjencat Civile, ndodhen në terren për evidentimin e çdo dëmi të shkaktuar në tokat bujqësore. Të dhënat e mbledhura do t’i përcillen Qeverisë Shqiptare për adresimin financiar të situatës.
Ai theksoi se qeveria ka miratuar një paketë financiare për përballimin e pasojave të përmbytjeve të ditëve të fundit, me synimin që asnjë qytetar apo fermer i prekur të mos mbetet pa mbështetje. Ministria e Bujqësisë, së bashku me pushtetin vendor, po kryen një proces të plotë vlerësimi për të përcaktuar masën e dëmshpërblimit dhe format e mbështetjes.
Ministri konfirmoi se do të ketë dëmshpërblim për fermerët, ndërsa paralelisht do të vijojnë investimet në përmirësimin e infrastrukturës bujqësore, përfshirë argjinaturat dhe kanalet kulluese, si dhe thirrjet për financime për bashkitë.
Gjatë ditës, ministri zhvilloi takime edhe në Librazhd, ku u diskutua mbi skemat kombëtare të mbështetjes për bujqësinë. Për herë të parë, sipas tij, po organizohen dëgjesa publike me fermerët për të përshtatur skemat me nevojat reale të tyre.
Ai bëri të ditur se çdo vit janë në dispozicion rreth 52 milionë euro fonde për fermerët, ndërsa synimi është që këto skema të harmonizohen me legjislacionin e Bashkimit Europian, në kuadër të detyrimeve që ka Shqipëria në procesin e integrimit.
