Universiteti “Fan S. Noli” ka nisur vitin e ri akademik me një rritje të ndjeshme të regjistrimeve të studentëve në programet bachelor dhe ato profesionale 2-vjeçare. Deri në fund të fazës së tretë të raundit të dytë janë regjistruar 482 studentë, 15 më shumë krahasuar me të njëjtën periudhë të vitit të kaluar. Prej tyre, 369 janë në programet bachelor dhe 113 në programet profesionale.
Ndër fakultetet me më shumë regjistrime kryeson ai i Shkencave Natyrore dhe Humane me 190 studentë, i pasuar nga Fakulteti i Ekonomisë me 127, Fakulteti i Edukimit me 103 dhe Fakulteti i Bujqësisë me 62 regjistrime. Degët më të kërkuara kanë qenë Infermieria, Mami, Sportet, Shkencat Informatike, Financa dhe Anglishtja, ndërsa optimizëm shihet edhe në degët e bujqësisë dhe ato të mësuesisë që kanë arritur kuotat minimale për hapje.
Interes i lartë është shënuar edhe për programet master. Deri më tani janë dorëzuar 463 aplikime, nga të cilat 148 për master shkencor dhe 315 për master profesional. Fakulteti i Edukimit kryeson me 200 aplikime, i ndjekur nga Shkencat Natyrore dhe Humane me 135, Ekonomia me 88 dhe Bujqësia me 40. Disa programe, si Masteri Shkencor në Shkencat Bujqësore, Masteri për Arsimin Special dhe ai për Arsimin Fillor, e kanë tejkaluar kuotën e regjistrimeve.
Procesi i regjistrimeve vijon ende deri në përfundim të raundit të tretë.
