Prej një çerek shekulli, grupi muzikor “Nostalgjia” ka qenë zëri dhe fryma e serenatës pogradecare, duke mbajtur gjallë një traditë të hershme që është kthyer në identitet të qytetit. I krijuar në fund të viteve ’90, grupi u formua nga dashuria e disa muzikantëve të rinj për këngën qytetare dhe dëshirën e tyre për ta ruajtur e përçuar këtë trashëgimi tek brezat e ardhshëm. Tingujt e kitarës, mandolinës dhe harmonitë vokale të veçanta e bënë shpejt “Nostalgjinë” të njohur, duke fituar vendin e tyre të merituar në skenën kulturore të Pogradecit dhe më gjerë.
Në këto 25 vite, ata kanë marrë pjesë në dhjetëra koncerte brenda dhe jashtë vendit, duke sjellë gjithmonë atmosferën e ëmbël të serenatës, ku kënga e thjeshtë qytetare shndërrohet në një gjuhë universale dashurie e kujtese. Muzika e tyre është bërë pjesë e çdo feste, por edhe një urë lidhëse mes brezave, që nëpërmjet melodive gjejnë përjetësinë e traditës.
Sot, pas një udhëtimi të gjatë artistik, “Nostalgjia” feston 25-vjetorin e krijimit me një koncert të veçantë në sallën e shfaqjeve “Lasgush Poradeci”, duke ndarë me publikun këngët më të dashura që kanë shoqëruar rrugëtimin e tyre. Ky jubile është një moment krenarie, jo vetëm për grupin, por për gjithë Pogradecin që e sheh veten të pasqyruar në tingujt e “Nostalgjisë”.
