Në një takim të rëndësishëm institucional për zhvillimin e bashkëpunimeve ndërkombëtare, Kryetari i Bashkisë Pogradec, Ilir Xhakolli, mirëpriti Kryetarin e Bashkisë Pommelsbrunn të Gjermanisë, z. Armin Haushahn. Pjesë e takimit ishin gjithashtu z. Arnold Geiger, Drejtor i Përgjithshëm i Fondacionit Nehemia Gateway, dhe znj. Arlinda Merdani, Drejtuese e Projekteve Globale të këtij fondacioni.
Gjatë takimit, u vlerësua bashkëpunimi i vazhdueshëm dhe i frytshëm ndër vite midis Bashkisë së Pogradecit dhe Fondacionit Nehemia Gateway, me kontribut të ndjeshëm në zhvillimin e qëndrueshëm të komunitetit lokal, sidomos në arsim dhe shërbime sociale.
Kryetari Xhakolli prezantoi potencialet që ofron qyteti i Pogradecit në sektorë të rëndësishëm si turizmi, kultura, trashëgimia natyrore dhe projektet e gjelbërta, duke nënvizuar se këto janë baza solide për zgjerimin e bashkëpunimit me Bashkinë Pommelsbrunn, në një marrëdhënie afatgjatë ndërmjet dy qyteteve.
Në fokus të diskutimeve ishin gjithashtu mundësitë për shkëmbime kulturore, zhvillim të kapaciteteve lokale dhe bashkëpunim konkret në projekte që sjellin impakt të drejtpërdrejtë për qytetarët.
Ky takim shënon një tjetër hap pozitiv për pozicionimin e Pogradecit si një partner aktiv në nivel ndërkombëtar, duke krijuar ura të reja bashkëpunimi dhe zhvillimi në të mirë të komunitetit lokal.
