Policia e Korçës ka referuar materialet në Prokurori dhe ka nisur procedim penal ndaj dy punonjëseve të postës në Devoll, të dyshuara për përvetësim fondesh dhe falsifikim dokumentesh. Specialistët e Seksionit për Hetimin e Krimeve Ekonomike dhe Financiare bëjnë me dije se procedimi ka nisur për veprat penale “Vjedhja duke shpërdoruar detyrën”, “Falsifikimi i dokumenteve” dhe “Falsifikimi kompjuterik”, të kryera në bashkëpunim.
Të proceduara janë shtetaset P. Sh., 29 vjeçe, banuese në Bilisht, përgjegjëse e zyrës postare Vishocicë në Devoll, si dhe E. Ç., 27 vjeçe, po nga Bilishti, me detyrë arkëtare-llogaritare në degën postare Devoll. Nga hetimet dyshohet se gjatë periudhës shtator 2025 – janar 2026, ato kanë përvetësuar rreth 22 milionë lekë të rinj nga fondet e postës.
Sipas policisë, 29-vjeçarja dyshohet se ka shpërdoruar fondet e pensioneve dhe të ndihmës ekonomike, kryesisht të pensionistëve që jetonin jashtë vendit, duke falsifikuar nënshkrimet e tyre. Ndërkohë, 27-vjeçarja akuzohet se ka manipuluar dhe falsifikuar mandatpagesat, duke i hequr ato nga evidencat e arkës dhe sistemi i menaxhimit të parave cash, për të favorizuar vjedhjen e fondeve.
Policia bën me dije se vijojnë hetimet për identifikimin e personave të tjerë që mund të jenë të përfshirë në këtë skemë abuzimi.
