Në orët e vona të mbrëmjes së djeshme, një zjarr ka përfshirë banesën e shtetasit Gëzim Bono në fshatin Pilur të Bashkisë Devoll. Flakët janë përhapur me shpejtësi, duke shkaktuar dëme të konsiderueshme materiale dhe duke djegur pjesën më të madhe të shtëpisë.
Falë ndërhyrjes së shpejtë të forcave zjarrfikëse, është bërë e mundur izolimi i vatrës së zjarrit dhe shmangia e përhapjes së flakëve në banesat përreth. Megjithë dëmet e mëdha, janë arritur të shpëtohen pjesa e kuzhinës, plevica dhe disa bagëti që ndodheshin pranë godinës.
Sipas dyshimeve të para, shkaku i zjarrit mendohet të jetë një shkëndijë elektrike, por hetimet po vijojnë për të përcaktuar rrethanat e plota të ngjarjes.
Ndërkohë, Sektori i Emergjencave Civile në Bashkinë Devoll pritet të kryejë vlerësimin e plotë të dëmeve materiale gjatë orëve në vijim.
