Është një festë pagane e cila simbolizon largimin e dimrit dhe ndryshimin e moteve thonë më të moçmit dhe si e tillë shoqërohet me atmosferë festive në familje dhe lagjet e Korçës.
Korçarët e festojnë Ditën e Verës në 1 Mars dhe siç është trashëguar brez pas brezi në lagjet e vjetra të qytetit pati ndezje zjarresh, flakët e të cilit simbolizojnë largimin e së keqes. Por këtë vit kjo festë u prit mes reshjeve të shiut ashtu si vit pas viti ka më pak fëmijë thotë një i moshuar.
Kulaç, ëmbëlsira dhe veroret janë disa prej simboleve kryesore të festës së verës pa të cilat ardhja e saj nuk ka kuptim.
Ndryshe nga shumë qytete të tjera të Shqipërisë në Korçë ardhja e verës festohet në dy data, në 1 Mars edhe në 14 Mars dhe kjo lidhet me besimet fetare ortodokse dhe islame, megjithatë duket se “halli” i qytetarëve nuk janë datat apo shiu, por mungesa e zërave fëminorë për të luajtur në oborre dhe kaluar zjarret siç e do tradita.
