Për të kuptuar të gjithë pikturën e asaj që ndodhi sot me dorëheqjen e kryetarit të Partisë Demokratike Korçë, mjafton të kthehemi shumë pak më prapa me ndodhitë e kësaj partie dhe është lehtësisht e kuptueshme se cila dorë largoi Devis Osmanin nga karrigia blu.
Vetëm një muaj më parë ishte Ervin Salianji ai i cili mblodhi simpatizantë të shumtë të Partisë Demokratike në një nga hotelet e qytetit por ajo çka u vu re është se Devis Osman, Sorina Koti, Ledina Alolli e figura të tjera të rëndësishme të PD-së munguan.
Pak ditë më pas, Gazmend Bardhi dhe Flamur Noka erdhën në Korçë për t’u bërë thirrje qytetarëve korçarë për protestë, por këtë herë Osmani ishte aty, bashkë me të tjerët.
Burimet bëjnë me dije se Edmond Spaho dhe Sorina Koti prej më shumë se një viti nuk kanë më komunikim me Ervin Salianjin, duke u vendosur të tre në garë se kush do të jetë më i besuari i Sali Berishës.
Të njëjtët zëra pranë PD-së thanë se ligjin tanimë në këtë forcë politike në juglindje të vendit e bën djali nga Lozhani me emrin Ervin Salianji, i cili shërbimin ndaj Berishës e ka rritur në maksimum.
Viktima e parë e “ligjit në dorën e Maliqit” është Devis Osman, i cili duhet thënë se mbajti një pozicion korrekt me simpatizantët e PD-së por nuk mundi t’i bëjë ballë presionit të Salianjit – kush do të jetë viktima e radhës? Në PD e dinë…
