Kur bie fjala për Lotarinë Amerikane, mendja të shkon në Korçë. Kjo për faktin se një pjesë e mirë e fituesve janë korçarë. Dëshira e tyre është “toka e premtuar”.
“U bënë me shume se 10 vite që aplikoj për lotarinë amerikane, shpresoj ky të jetë viti i duhur. 10 vite e vazhdoj përsëri, mendoj se Amerika është vendi i realizimit të ëndrrave tona. Në Shqipëri jetohet por në Amerikë ka më tepër mundësi dhe ëndrra të realizuara”, thotë Selviona Veshi, aplikante e Lotarisë Amerikane.
Si Selviona, të shumtë janë të rinjtë që aplikojnë për t’u larguar nga vendi. Sido që të jetë përgjigjja e lotarisë këtë vit, sërish Selviona nuk do ndalet.
“Mendoj se deri diku janë të lodhur, nuk vlerësohen ashtu siç duhet. Mendoj që mundësia më e mirë për ta është të ikin ne Amerikë. Shpresoj që këtë vit të fitoj e ne rast se jo do vazhdoj të këmbëngul, e një ditë do iki. Deri sa jam korçare, do iki”, shprehet ajo.
Prindërit e saj nuk janë dakord që vajza të largohet përtej oqeanit.
Largimi nga vendi është kthyer në plagën më të madhe sociale të 10-vjeçarit të fundit, ku shumica e të rinjve e shohin të ardhmen jashtë atdheut, kryesisht në vendet e BE dhe SHBA.
