Edhe gjatë ditës së sotme, fluksi i lëvizjeve në pikat kufitare të juglindjes ka vijuar të jetë i lartë.
Në pikën e kalimit kufitar të Kapshticës, vetëm gjatë paradites janë regjistruar mbi 8 mijë shtetas që kanë kaluar kufirin, të shoqëruar nga rreth 3200 mjete. Një ditë më parë, në Kapshticë kanë lëvizur mbi 10 mijë shtetas në të dy anët e kufirit.
Policia kufitare në Kapshticë po punon me kapacitet të plotë, duke operuar me gjashtë sportele, tre në hyrje dhe tre në dalje, për të shmangur radhët e gjata dhe për të lehtësuar kalimin e qytetarëve.
Në pikën kufitare të Qafë Thanës, gjatë 24 orëve të fundit janë regjistruar 3502 hyrje dhe 3504 dalje. Aty po punohet me katër sportele në dalje, duke mundësuar një menaxhim të mirë të fluksit.
Pavarësisht fluksit të lartë, procedurat po zhvillohen normalisht, duke garantuar një menaxhim efikas të lëvizjeve në të dyja pikat kufitare.
