Shërbimi pneumo-ftiziatrik në spitalin rajonal të Korçës po përballet me një rritje të ndjeshme të rasteve, kryesisht për shkak të virozave stinore që shkaktojnë probleme në rrugët e frymëmarrjes.
Shefja e këtij shërbimi, Diana Aliçkolli, deklaroi se numri i pacientëve të paraqitur është rritur ndjeshëm krahasuar me muajin e kaluar. Aktualisht, në këtë repart janë të shtruar 35 persona, ndërsa çdo ditë kryhen rreth 70-80 vizita ambulatore.
Dr. Aliçkolli theksoi rëndësinë e trajtimit të situatës me seriozitet nga pacientët dhe kërkoi që simptomat të mos neglizhohen.
“Është e rëndësishme që pacientët të paraqiten herët për ndihmë mjekësore, në mënyrë që komplikacionet të shmangen,” u shpreh ajo.
Ndërkohë, shërbimi vijon të funksionojë me kapacitet të plotë për të përballuar fluksin e shtuar të pacientëve.
