Gripi, një sëmundje respiratore që prek sistemin e frymëmarrjes, vijon të mbetet shqetësim shëndetësor, sidomos në muajt e parë të vitit kur qarkullimi i virozave është më i lartë. Sipas mjekëve specialistë, në shumë raste, gripi është shfaqur me komplikime, duke prekur veçanërisht mushkëritë dhe duke rrezikuar shëndetin e pacientëve të kategorive më të ndjeshme.
Shefi i Shërbimit të Pneumo-Ftiziatrisë në Korçë, Samuel Kristo, thotë se situata virale e ngarkuar ka ndikuar në rritjen e rasteve me komplikime respiratore. Ai thekson rëndësinë e masave parandaluese për të shmangur pasojat serioze që gripi mund të shkaktojë.
Samuel Kristo
Shef i Shërbimit të Pneumo-Ftiziatrisë, Korçë
“Gripi nuk është një sëmundje e thjeshtë për t’u nënvlerësuar. Në shumë raste, sidomos te personat me sëmundje të tjera shoqëruese, ai ka kaluar me komplikime që prekin rëndë mushkëritë.”
Për t’u mbrojtur, mjekët rekomandojnë vaksinimin kundër gripit si mënyrën më efektive për të parandaluar sëmundjen, veçanërisht për personat e riskuar. Gjithashtu, theksohet zbatimi i masave të higjienës personale, shmangia e kontaktit me persona të sëmurë dhe ndjekja e një stili jetese të shëndetshëm.
Ndër më të rrezikuarit nga gripi janë fëmijët e vegjël, të moshuarit, gratë shtatzëna, si edhe ata me sistem imunitar të dobësuar apo me sëmundje kronike si problemet e zemrës, mushkërive dhe diabeti.
