Në ambientet e Universitetit “Fan S. Noli” në Korçë u zhvillua një simpozium shkencor kushtuar figurës së intelektualit dhe patriotit të shquar Llazar Zai Fundo, një nga mendimtarët më të rëndësishëm dhe kompleksë të fillimshekullit XX në Shqipëri.
Aktiviteti, i organizuar në bashkëpunim me Këshillin e Qarkut Korçë, mblodhi së bashku akademikë, studiues dhe studentë, të cilët sollën referime dhe diskutime mbi jetën, veprën dhe kontributin shumëplanësh të Fundos në filozofi, politikë dhe mendim kritik.
Të pranishëm në simpozium ishin:
• Prof. Dr. Lorenc Ekonomi, Rektor i Universitetit “Fan S. Noli”
• Erjon Nexhipi, Kryetar i Këshillit të Qarkut Korçë
• Sotiraq Filo, Kryetar i Bashkisë Korçë
Një moment domethënës i aktivitetit ishte prania e mbesës së Llazar Fundos, znj. Elisaveta Poçari Fundo, e cila përfaqësoi dimensionin njerëzor dhe familjar të këtij personaliteti të madh.
Përmes këtij simpoziumi, Universiteti i Korçës dhe institucionet vendore dhanë një shembull domethënës të kujtesës institucionale dhe vlerësimit të figurave historike, duke sjellë në vëmendjen e brezave të rinj një nga zërat më përparimtarë të mendimit shqiptar dhe evropian të shekullit XX.
