Shkolla Profesionale Teknike në Korçë organizoi “Ditët e Hapura”, një aktivitet i përvitshëm që ka për qëllim të ndihmojë nxënësit e klasave të 9-ta të orientohen drejt arsimit profesional. Gjatë këtij eventi, të rinjtë patën mundësinë të vizitojnë ambientet e shkollës, të shohin nga afër laboratorët bashkëkohorë dhe të informohen për degët që ofrohen, si dhe për mundësitë praktike që ata kanë për të zhvilluar aftësitë e tyre profesionale.
Drejtoresha e shkollës, Anxhela Taho, theksoi rëndësinë e arsimit profesional në kohën e sotme, kur tregu i punës ka gjithnjë e më shumë nevojë për profesionistë të specializuar. Ajo vuri në dukje se interesimi i të rinjve për këto programe është në rritje dhe se zgjedhja e drejtimit të duhur luan një rol kyç në ndërtimin e së ardhmes së tyre.
Ky aktivitet shërben si një urë lidhëse mes arsimit bazë dhe arsimit profesional, duke ndihmuar nxënësit të marrin një vendim të informuar bazuar në prirjet e tyre dhe nevojat e tregut. Nxënësit aktualë të shkollës ndanë eksperiencat e tyre pozitive, duke e parë arsimin profesional si një alternativë të vlefshme për formim dhe sukses në të ardhmen.
