Një rast flagrant dhune në familje është raportuar në qytetin e Pogradecit, ku një 49-vjeçar ka dhunuar fizikisht bashkëshorten e tij, ndonëse ndaj tij ishte vendosur masa e sigurisë “arrest në shtëpi”.
Ngjarja ka ndodhur në Mëmëlisht, ku shtetasi P. F., në kundërshtim me vendimin e gjykatës, ka ushtruar dhunë ndaj bashkëshortes dhe më pas është larguar nga banesa.
Policia ka referuar materialet në Prokurori dhe e ka shpallur në kërkim 49-vjeçarin, ndërsa vijojnë kontrollet për kapjen e tij.
Burime pranë policisë bëjnë me dije se ky shtetas ishte më herët i dënuar për dhunë në familje, ndërsa tani përballet me një tjetër akuzë për të njëjtën vepër, por edhe për thyerje të masës së sigurisë.
Njoftimi i policisë;
Specialistët për Hetimin e Krimeve të Komisariatit të Policisë Pogradec referuan materialet në Prokurori dhe shpallën në kërkim shtetasin P. F., 49 vjeç, banues në Mëmëlisht, pasi ndërkohë që ishte me masë sigurie “Arrest në shtëpi”, për veprën penale “Dhuna në familje”, ka ushtruar dhunë fizike ndaj bashkëshortes së tij dhe është larguar nga banesa.
