Inteligjenca artificiale është bërë tashmë një pjesë integrale e jetës së përditshme, veçanërisht për të rinjtë. Ajo ndihmon në lehtësimin e shumë proceseve – nga kërkimet shkollore, deri te përpilimi i eseve apo ideve kreative. Por, ndërsa teknologjia ofron zgjidhje të shpejta dhe të gatshme, ekspertët ngrenë shqetësimin se përdorimi i tepruar i saj mund të dëmtojë aftësitë krijuese dhe mendimin kritik.
Sipas sociologut Eriseld Kalemaj, krijimtaria është një aftësi që zhvillohet përmes përvojës, gabimeve dhe përpjekjes së vazhdueshme. “Kur të rinjtë përballen me zgjidhje të gatshme nga inteligjenca artificiale, ata humbin dëshirën për të eksperimentuar, për të imagjinuar dhe për të ndërtuar ide origjinale,” shprehet ai.
Sfida më e madhe sot është edukimi për përdorimin e ndërgjegjshëm të teknologjisë, në mënyrë që ajo të shërbejë si mjet ndihmës, pa zëvendësuar procesin natyror të të menduarit krijues dhe shprehjes personale. Vetëm kështu mund të ruhet balanca mes përfitimeve teknologjike dhe thelbit njerëzor të krijimtarisë.
