Fshati piktoresk i Bishnicës në zonën e Mokrës ka mbledhur për herë të parë banorë të saj të shpërndarë nëpër qytete të ndryshme të Shqipërisë, në Europë dhe në Shtetet e Bashkuara të Amerikës, për të festuar edicionin e parë të Festës së fshatit.
Pas shumë vitesh qetësie, qendra, rrugët dhe oborret e fshatit u gjallëruan sërish nga njerëzit, duke e kthyer këtë ditë në një festë të madhe kujtimesh. Organizimi u shoqërua me një ekspozitë fotografike që risolli historinë e Bishnicës, jetën e sharrtarëve dhe inxhinierëve, e gërshetuar me këngë, valle popullore dhe gatimet karakteristike të zonës.
Nga qendra e drurit te potenciali turistik
E njohur si e bukura e Mokrës, Bishnica ofron një natyrë të paprekur me pyje dhe ajër të pastër, si dhe një sërë destinacionesh që tërheqin vizitorë vendas dhe të huaj. Dikur, ky fshat ishte ndër më të populluarit në krahinë, falë stabilimentit të sharrave dhe përpunimit të lëndës drusore që siguronte punësim për dhjetëra familje dhe ishte shtylla kryesore e ekonomisë së zonës.
Pas mbylljes së këtij stabilimenti, shumë banorë u detyruan të emigronin, ndërsa sot në fshat kanë mbetur vetëm pak familje që jetojnë kryesisht me blegtori dhe bujqësi. Banorët theksojnë se, pavarësisht viteve larg vendlindjes, ky organizim i parë është një hap i rëndësishëm për të ruajtur traditat dhe për të forcuar lidhjen me rrënjët e tyre. Aktiviteti synon të kthehet në një traditë të përvitshme, duke promovuar potencialin e gjerë turistik e kulturor të komunitetit.
Foto: Bufi i Urtë
