Policia Kufitare në Kapshticë ka arrestuar në flagrancë një 48-vjeçar që tentoi të fuste kontrabandë në territorin shqiptar dhjetëra steka me cigare dhe produkte ushqimore.
Gjatë kontrolleve të shtuara në Pikën e Kalimit Kufitar Kapshticë, shërbimet e Policisë Kufitare kaluan për kontroll të detajuar në vijë të dytë një automjet me drejtues shtetasin S. L., 48 vjeç, banues në fshatin Plug, Lushnjë.
Nga kontrolli i ushtruar, në automjet u zbuluan të fshehura 32 steka me cigare dhe disa produkte ushqimore, të cilat shtetasi S. L. tentonte t’i fuste në Shqipëri në mënyrë të paligjshme, pa i deklaruar në doganë.
Pas përfundimit të veprimeve procedurale, 48-vjeçari u arrestua për veprën penale “Kontrabanda me mallra që paguajnë akcizë”. Mallrat e sekuestruara u bënë pjesë e provave materiale në funksion të hetimit.
Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Korçë, për veprime të mëtejshme.
Policia Kufitare vijon kontrollet e imtësishme në kufi për të parandaluar dhe goditur paligjshmërinë.
