Puna për përmirësimin e infrastrukturës dhe mbrojtjen nga përmbytjet në fshatrat e Bashkisë Korçë po ecën me ritme të larta, në kuadër të projekteve të emergjencave civile. Ndërhyrjet e fundit janë fokusuar në disa zona problematike, ku reshjet e dendura përbëjnë rrezik të vazhdueshëm për komunitetet lokale.
Në fshatin Porodinë po kryhet veshja me beton e përroit përgjatë një segmenti prej 655 metrash, një masë që synon të kontrollojë rrjedhjen e ujërave dhe të parandalojë përmbytjet në tokat dhe banesat përreth. Edhe në fshatin Goskovë, po realizohet një ndërhyrje e ngjashme, ku përroi që përshkon zonën po vishet me beton në një gjatësi prej 195 metrash.
Ndërkohë, në fshatin Polenë, ku përroi kalon në mes të zonës së banuar, po ndërtohet një mur mbrojtës me gur në një gjatësi prej 40 metrash. Ky investim synon jo vetëm të mbrojë territorin nga përmbytjet, por edhe të ruajë integritetin e infrastrukturës ekzistuese dhe sigurinë e banorëve.
Këto projekte përbëjnë një hap të rëndësishëm drejt përforcimit të infrastrukturës në zonat rurale dhe përmirësimit të jetesës për komunitetet që preken më drejtpërdrejt nga ndryshimet klimatike dhe reshjet intensive. Autoritetet vendore shprehen se ndërhyrje të tilla do të vijojnë edhe në zona të tjera të bashkisë, në funksion të një mbrojtjeje të qëndrueshme dhe afatgjatë.
