Biblioteka e fëmijëve “Thoma Turtulli” në qytetin e Korçës ka hyrë zyrtarisht në proces rikonstruksioni të plotë. Ky investim do ta shndërrojë bibliotekën në një hapësirë bashkëkohore, ku përveç leximit tradicional të librit, fëmijët e moshave 8-15 vjeç do të kenë mundësi të ndjekin edhe kurse mbi teknologjinë dhe inovacionin.
Aktualisht, godina është në fazën e punimeve dhe përkohësisht është vendosur një derë duralumini, ndërsa të gjitha objektet dhe pajisjet e brendshme do të restaurohen dhe do të rikthehen sërish në vendin e tyre origjinal.
Godina e Bibliotekës “Thoma Turtulli” i është dhuruar qytetit të Korçës në vitin 1930 nga filantropi me të njëjtin emër dhe me këtë ndërhyrje pritet të kthehet sërish në një pikë referimi të rëndësishme për fëmijët korçarë.
