Në ambientet e Bashkisë Korçë, kryetari Sotiraq Filo mirëpriti z. Kevin Coleman, kryetarin e Bashkisë së Westland, Michigan, SHBA. Vizita vjen në kuadër të forcimit të marrëdhënieve mes dy qyteteve dhe komuniteteve që i lidhin.
Kryetari Filo u shpreh i lumtur për këtë takim, duke theksuar vlerësimet që z. Coleman ka për komunitetin shqiptar në Westland, një pjesë e mirë e të cilit e ka origjinën nga zona e Korçës. Ai vlerësoi integrimin dhe kontributin e tyre në jetën ekonomike e sociale të qytetit amerikan.
Një shembull suksesi i diasporës është Marjo, një i ri nga fshati Dvoran, i cili prej afro 20 vitesh jeton në Westland dhe ka krijuar një biznes të suksesshëm në fushën e transportit, duke bashkëpunuar me kompani prestigjioze si Ford.
Takimi u konsiderua një hap i rëndësishëm drejt bashkëpunimeve të ardhshme dhe forcimit të lidhjeve mes dy komuniteteve, duke sjellë krenari për bashkëqytetarët e Korçës në diasporë.
