Drejtoria Vendore e Policisë Korçë ka vijuar me referimin e rasteve të veçanta në Prokurori, pas evidentimit të disa shkeljeve ligjore në bashkitë Maliq dhe Pogradec.
Specialistët për Hetimin e Krimeve në Komisariatin e Policisë Maliq kanë nisur procedim penal ndaj shtetasit F. F., 65 vjeç, i cili u kap në flagrancë duke kryer punime ndërtimi pa leje.
Gjithashtu, u procedua penalisht shtetasi E. H., 44 vjeç, banues në fshatin Dardhas, Pogradec, pasi u kap duke transportuar rreth 20 metër kub lëndë drusore të prerë në mënyrë të paligjshme. Lënda drusore u sekuestrua në cilësinë e provës materiale.
Ndërkohë, nga Komisariati i Policisë Pogradec u referuan materialet në Prokurori për nisjen e procedimit penal ndaj katër shtetasve: I. T., 53 vjeç, P. P., 35 vjeç, J. M., 26 vjeç dhe J. M., 52 vjeç, të gjithë banues në Pogradec. Këta shtetas dyshohet se janë përfshirë në një konflikt fizik për motive pronësie, ku kanë goditur njëri-tjetrin me sende të forta.
Po më datë 18.07.2025, në kodrat e fshatit Çërravë ka rënë zjarr në një sipërfaqe toke me bimësi. Policia dhe shërbimet zjarrfikëse po punojnë për të zbardhur rrethanat e ngjarjes dhe për të identifikuar autorin/ët e mundshëm.
Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Korçë, për veprime të mëtejshme ligjore.
