Prefektura e Qarkut Korçë ka bërë me dije se prej datës 20 Korrik janë evidentuar dy vatra zjarri në territorin e qarkut, në zonat e Dishnicës dhe Vërnikut.
Në fshatin Dishnicë, Njësia Administrative Bulgarec, Bashkia Korçë, zjarri vijon të jetë aktiv, megjithëse me intensitet të ulët. Forcat e shërbimit pyjor, në bashkëpunim me strukturat e Nj.Adm. Bulgarec, janë angazhuar prej orës 05:00 të mëngjesit në terren. Ato po punojnë për krijimin e brezave mbrojtës, me qëllim parandalimin e përhapjes së flakëve në zona të tjera pyjore ose bujqësore.
Ndërkohë, në fshatin Vërnik, Njësia Administrative Qendër Bilisht, Bashkia Devoll, zjarri i regjistruar më herët është neutralizuar plotësisht, dhe nuk janë raportuar riaktivizime deri në momentin e fundit.
Strukturat vendore dhe shërbimet e emergjencës mbeten në gatishmëri të shtuar, për të ndërhyrë në kohë në rast të ndonjë situate të re.
