Gjykata e Korçës ka pranuar kërkesën e prokurorisë për caktimin e masës së sigurisë “arrest në burg” për Ilirjan Selmanin, 31 vjeç, i dyshuar si autor i vrasjes së 52-vjeçares Kozeta Teço, ngjarje e ndodhur tre ditë më parë në qytetin e Pogradecit.
Gjatë seancës gjyqësore për vlerësimin e masës së sigurisë, Selmani ka mohuar kategorikisht përfshirjen në ngjarje, duke deklaruar se nuk është autori i vrasjes dhe as ka bashkëjetuar ndonjëherë me viktimën.
Të njëjtin qëndrim ka mbajtur edhe avokati i tij mbrojtës, i cili ka kërkuar mosmarrjen e masës së arrestit me burg, duke theksuar se prokuroria nuk ka asnjë provë direkte që e lidh Selmanin me krimin.
Megjithatë, prokuroria ka paraqitur në gjykatë dy prova kryesore: njolla gjaku në një palë pantallona të gjetura në një kazan mbeturinash pranë banesës së viktimës, si dhe pamje filmike ku Selmani shihet duke hyrë dhe dalë nga banesa e Kozeta Teços.
