Banorët e fshatit Zvezdë në bashkinë Maliq kanë dalë sot në protestë, duke denoncuar mungesën e ujit të pijshëm prej më shumë se tre dekadash. Ata thonë se, edhe pse aktualisht po zhvillohen punime për ndërtimin e një ujësjellësi të ri, situata mbetet e pashpresë.
Sipas banorëve, investimi po kryhet “pa radhë” dhe me cilësi të dobët, ndërsa mungesa e kanalizimeve për ujërat e zeza vazhdon të mbetet një problem i madh. Ata shprehen të shqetësuar se punimet nuk po ndiqen nga asnjë përfaqësues i pushtetit vendor dhe se frikësohen se pas përfundimit të projektit, fshati mund të mbetet sërish pa ujë të pijshëm.
“Na kanë premtuar shumë herë, por asgjë nuk ka ndryshuar. Tani bëjnë ujësjellësin, por nuk po shohim as cilësi, as përkujdesje. Uji është jetik, ndërsa ne jetojmë si në mesjetë,” – thane protestuesit.
Banorët kërkojnë që pushteti vendor të marrë masa urgjente për të garantuar jo vetëm përfundimin e punimeve sipas standardeve, por edhe zgjidhjen e përhershme të furnizimit me ujë të pijshëm.
